تعالى شوفى ازاى تبرمجى عقلك عشان تتعاملى مع خطيبك صح

[بتنجانه]

ازاي تتعاملي مع خطيبك

طبعا مش محتاجة حد يقولك إن من المفروض إن أيام الخطوبة تكون أحلى أيام بتعيشها أي بنت.. بس أكيد بعد ما اتخطبتي لقيتي الحياة مش زي ما سمعت.. ولقيتي نفسك على طول متوترة وأعصابك تعبانة.. عمالة تفكري في ميت حاجة وحاجة.. ده بالإضافة إلى إنك مش عارفة ازاي تتعاملي مع خطيبك.. وكل شوية خناقات وخلافات بينكم.. بسبب، ومن غير سبب...

واللي زاد وغطى كمان.. الخلافات اللي ممكن تحصل بين خطيبك وأهلك، أو بينك إنت وبين أهل خطيبك.. والخلافات دي أكيد بيكون لها تأثير كبير ، وبتخلي الأيام الحلوة دي تضيع في خناق وعتاب وكلام فاضي...

طيب تعالي نفكّر مع بعض، ونشوف إيه السبب في ده كله...
فكّرتِ!!!

شوفي يا قمر.. السبب في كل اللي إنت حاسة بيه ده هو اختلاف طباع كل واحد عن التاني، وإن كل واحد مش عارف ازاي يقرّب من الطرف التاني ويفهمه صح.. علشان كده هاقولك دلوقتي على الأساسيات اللي تقدري من خلالها إنك تتعاملي مع خطيبك علشان تكسبي حبه ليكي..

نشوف الأساسيات دي مع بعض

_ _ _ _ _ _ _ _ _ _ _ _ _ _ _ _

الأساس الأول
القبول

ده أول أساس لازم تقوم عليه العلاقة بين أي اتنين مخطوبين.. هو إنه يكون فيه قبول بينك وبينه.. والقبول ده بيكون من حيث الشكل والدم، ولا يوجد ما ينفّرك منه أو ينفره منك..

الأساس الثاني
خليكِ رقيقة

لازم كل بنت تكون رقيقة في تصرفاتها مع خطيبها، ومش قصدي هنا الرقة المصطنعة.. لأ طبعاً.. قصدي إنك تتعاملي معاه على طبيعتك وبأسلوبك الحلو اللي يخليه يحس إنك أحلى إنسانة في الدنيا، وطبعا من غير تكلف أو كدب.

الأساس الثالث
افتحي مجالات للكلام

خليكِ ذكية وافتحي مع خطيبك مجالات للكلام؛ حتى لو الكلام البسيط زي مثلاً إنك تقولي له على الحاجات اللي بتحبيها، وتسأليه هو كمان بيحبّ إيه.. ومش عيب إنك تتكلمي معاه عن حياتك أيام الدراسة.. عن إيه اللي حققتيه في حياتك قبل ما ترتبطي بيه.. وإيه اللي نفسك تحققيه بعد كده.. إيه الحاجات اللي بتفرَّحك.. وإيه الحاجات اللي بتضايقك.

وخليه هو كمان يتكلم عن نفس الموضوعات دي، واسمعي كلامه كويس، وركزي فيه.. وعلى فكرة الموضوعات دي بالرغم من إنها بسيطة إلا إنها هتفتح مجالات تانية للكلام.. وهتخلي كل طرف يتعرف على وجهة نظر الطرف التاني في الحياة.

وكمان هيعرف إيه الحاجات اللي بيحبها الطرف التاني ويعملها.. وإيه اللي بيكرهها وبتضايقه علشان يتجنبها.

الأساس الرابع
احترمي رأيه

احترمي رأي خطيبك في أي حاجة يقولها، واوعي تسخري من كلامه حتى لو إنت شايفة إن كلامه كده سطحي ومش عاجبك.. اسمعيه للآخر وشوفي وجهة نظره إيه، وحاولي بأسلوب هادي إنك تقنعيه بوجهة نظرك.

الأساس الخامس
احترمي صراحته
لو خطيبك صرّح لك بحاجة محدش يعرفها غيرك، زي مثلا إنه اتكلم معاكي عن إمكانياته المادية احترمي صراحته دي.. واقفي جنبه.

الأساس السادس
محدش كامل

خليكِ دايماً حاطة قدامك القاعدة دي وهي: "إن مفيش حد كامل، وإن الكمال لله وحده".. يعني صعب جداً إنك تلاقي خطيبك مفيهوش عيوب.. أكيد لازم يكون فيه عيوب.. بس إنت خليكي ذكية.. وشوفي يا ترى العيوب دي مقبولة ولا لأ.. لو كانت مقبولة وهتقدري تستحمليها يبقى مفيش مشكلة..


الأساس السابع
حاولي تغيريه

والأساس ده مرتبط بالأساس الرابع، يعني شوفي إيه العيوب اللي في خطيبك وحاولي إنك تغيريها للأحسن بس طبعا بأسلوب حلو ومن غير ما يحس.

زي مثلا.. لو كان لِبسُه مش شيك يبقى حاولي بالراحة إنك تغيري العيب ده بإنك تنتهزي أي مناسبة وتجيبي له مثلاً قميص شيك وتقولي له: إن الموديل ده بيخلّيه أحسن من الموديلات التانية اللي بيلبسها.. ويا ريت يحاول إنه يغير للموديلات الجديدة دي...


الأساس الثامن
بلاش حد يدخل بينكم

شوفي يا قمر.. علشان العلاقة بين أي اتنين تنجح يبقى محدش يدخل بينكم خصوصا الأصدقاء.. وأي خلاف بينكم حاولوا إنكم تحلوه بينكم وبين بعض.

واوعي تقارني بين خطيبك وخطيب واحدة صاحبتك أو خطيب أختك.. خليكِ عارفة إن كل واحد بيختلف عن التاني، وكل واحد وليه ظروفه.

الأساس التاسع
قرّبي من أسرته

يا ريت تحترمي أسرته، وتحاولي إنك تقريي منهم، وتكوني صديقة ليهم، وتنتهزي أي مناسبة وتزوريهم، ومفيش مانع من إنك تاخدي معاكِ هدية شيك؛ لأن دي هتخلي مامته تحبك، وده اللي احنا عايزينه.

الأساس العاشر
بلاش نتكلم في الماضي
بلاش تتكلمي عن حياتك العاطفية في الماضي قبل ما ترتبطي بيه، ولا تسأليه هو كمان عن حياته العاطفية قبل ما يرتبط بيكِ، وكل واحد ينسى اللي فات في حياته، ويبدأ صفحة جديدة.. دي حاجة.. ولو عايزين تتكلموا في اللي فات يبقى الكلام يتفتح مرة واحدة بس، ويكون من غير تفاصيل كتير.

دي كانت شوية حاجات بسيطة
يا ريت تمشي عليها..

[mahmoud11]

ايوه كده خليكى فى المواضيع دى

انما تقوليلى ازاى نتعامل معاهم

[بتنجانه]

هههههههه
انا بتاع كله يا محمود

اه

نورت

[FIDOO]

موضوع جميل اوى يا باتى ومفيد جدا لكل عروسين فعلا فيه مشاكل كتير بتدخل تضيع الخطوبه ومنها برضه الغيره الذائده

[النجم الساطع]

الأساس الثاني
خليكِ رقيقة
لازم كل بنت تكون رقيقة في تصرفاتها مع خطيبها،
ماهى دى نصيبة تلاقيها الملكة اليزابيث وبعد الجواز تكتشف انك متجوز تايسون ههههههههههههه

وخليه هو كمان يتكلم عن نفس الموضوعات دي، واسمعي كلامه كويس، وركزي فيه.. وعلى فكرة الموضوعات دي بالرغم من إنها بسيطة إلا إنها هتفتح مجالات تانية للكلام.
يعنى تقفى لة على الواحدة .فعلا بتفتح مجالات عديدة للنكد هههههههههههه


الأساس الرابع
احترمي رأيه


الأساس الرابع
احترمي رأيه

احترمي رأي خطيبك في أي حاجة يقولها، واوعي تسخري من كلامه حتى لو إنت شايفة إن كلامه كده سطحي ومش عاجبك.. اسمعيه للآخر وشوفي وجهة نظره إيه،

ودة طبعا من منطلق لما نروح البيت يا حنفى استنى عليا هههههههههههههه

الأساس الخامس
احترمي صراحته
لو خطيبك صرّح لك بحاجة محدش يعرفها غيرك، زي مثلا إنه اتكلم معاكي عن إمكانياته المادية احترمي صراحته دي.. واقفي جنبه.
وطبعا هايحصل ان العيلة والاصدقاء والجيران وبياع الخظار اللى تحت البيت وصاحب الكشك بيعرفوة ظروفة المادية ههههههههههههههههههههه


الأساس السادس
محدش كامل

خليكِ دايماً حاطة قدامك القاعدة دي وهي: "إن مفيش حد كامل، وإن الكمال لله وحده".. يعني صعب جداً إنك تلاقي خطيبك مفيهوش عيوب..

ومع ذلك بتبقوا عايزين سوبر مان فى كل حاجة ربنا يشفى ههههههههههههههه


زي مثلا.. لو كان لِبسُه مش شيك يبقى حاولي بالراحة إنك تغيري العيب ده بإنك تنتهزي أي مناسبة وتجيبي له مثلاً قميص شيك وتقولي له:
انت بتعمل اية انت هاتخرج معايا كدة ولا اية اقول اية لو حد من اصحابى شافنى معاك كدة ههههههههههههههههههههه


شوفي يا قمر.. علشان العلاقة بين أي اتنين تنجح يبقى محدش يدخل بينكم خصوصا الأصدقاء.. وأي خلاف بينكم حاولوا إنكم تحلوه بينكم وبين بعض
يعنى تلاقيك متخانق معاها تتصل واحدة تقولك انا فلانة صاحبة خطيبتك معلش هى ما تقصدش تقولك كدة امبارح او تقولك انت لو ما جبتش كذا مش هاتعرفك تانى وتيجى تاخد شبكتك فى ستين داهية هههههههههههههههههههه


يا ريت تحترمي أسرته، وتحاولي إنك تقريي منهم، وتكوني صديقة ليهم، وتنتهزي أي مناسبة وتزوريهم، ومفيش مانع من إنك تاخدي معاكِ هدية شيك؛ لأن دي هتخلي مامته تحبك، وده اللي احنا عايزينه
طبعا من مبدا تاخدوا باليمين واخد بالشمال بس كلها كام شهر ههههههههههههه

الأساس العاشر
بلاش نتكلم في الماضي
بلاش تتكلمي عن حياتك العاطفية في الماضي قبل ما ترتبطي بيه،
بلاش احسن . خلى الطابق مستور هههههههههه

[النجم الساطع]

هههههههههههههه على فكرة انا لسة صغنون عندى 19 سنة بس

[FIDOO]

والله يا كريم انت اكتر واحد حاسس انك هتبقى خيخه مع خطيبتك

[بتنجانه]

ههههههههههههههههههه

ده انت مش عاجبك العجب يا عم النجم

وانا مع فيدو

وبكره نقعد جمب الحيطه............

ههههههههههههه